WAAR IS ONS?

AANWYSINGS VANAF N1

Besoekers aan die kamp is welkom, mits jy gereël het. (Jy kan dit hier reël). As gevolg van die aard van die kampprogram is dit nie altyd moontlik om besoekers te ontvang nie. As jy die kamp wil besoek, of kies om self op die kamp te kom in plaas van om bus te ry, volg die aanwysings hieronder noukeurig:

Aanwysings na Lunsklip:

Uit ondervinding weet ons mens kom nie noodwendig met ’n GPS reguit by Lunsklip uit nie. Maar met hierdie aanwysings het niemand nog ooit verdwaal nie! Volg asseblief die roete soos hieronder uiteengesit. Daar is ander paaie ook, maar as jy hierdie roete volg, weet ons waar om te gaan soek as daar fout kom. Daar is nie goeie selfoon- of internetopvangs op die kamp nie. Sorg dat jy voordat jy vertrek die kode van die hoofhek het.

Dis te laat om te probeer bel as jy voor die toe hek staan.

Die GPS verwysing is  24° 2’9.80″S en  29°10’27.76″O (Klik hier om dit na desimale om te skakel) Die rit neem jou ongeveer 2.5 ure vanaf Pretoria.

Neem die N1 noord na Polokwane (Pietersburg), Verlaat die N1 by die tolhek net voor Mokopane (Potgietersrus). Ry deur die dorp. Aan die anderkant van die dorp is daar ‘n afdraai, links na Percy Fyfe toe. (net voor die treinbrug wat die treinspoor oor die pad neem, maar dalk sien jy nie eers die brug nie!)

Nadat jy links gedraai het kruis jy die treinspoor. Daar is vendusiekrale op regterhand. Dis nog teerpad. Ry sowat 7km. Dan is daar ‘n bord wat wys Percy Fyfe reguit en Lunsklip regs. Draai regs, weer oor die spoor en nou is dit grondpad. Ry maar stadig – die pad is soms sleg. Volg die pad vir sowat 20 km en dan sal jy weer die treinspoor kruis waar Lunsklipstasie op linkerhand is. Daar is egter nou net vervalle geboue.

Regs, anderkant die spoor, is die ingang na Percy Fyfe. Indien die hek nie oopstaan nie, soek vir die kodeslot tussen al die ander slotte. Hopelik het jy voor jy vertrek het, die kode gekry. Na jy in is, sluit asseblief weer die slot presies soos dit was in die ketting. Dit is baie belangrik want Natuurbewaring gebruik die ander slot/te en ons moet nie mekaar uitsluit nie. Nou is jy binne die reservaat. Na ‘n paar kilometer is die ou plaashuis (nou ‘n kantoor) en Natuurbewaring se geboue. Ry verby die ou plaashuis vir nog so kilometer of twee tot jy die kampterrein sien. Gaan oor die beeshek en hou reguit aan. Die ingang vir motors is verby die terrein en dan draai jy links.

Ry tot by die kombuis. Daar sal altyd iemand wees om jou te ontvang. Veilige reis!